Gönguleiðir

Merktar gönguleiðir

Stóragjá - Grjótagjá - Hverfjall/Hverfell - Dimmuborgir; 2-3 klst.

Leiðin hefst við vegamót þjóðvegarins austan við vatnið. Frá Stórugjá er merkt gönguleið að Grjótagjá þar sem farið er um gróðursælt land. Frá Grjótagjá að Hverfjalli/Hverfelli er gengið um sanda og hraun. Leiðin er auðveld ef farið er með gát. Aflíðandi og auðveldur stígur liggur á Hverfjall/Hverfell að norðvestan en nokkuð brött slóð að sunnan. Frá Hverfjalli/Hverfelli að bílastæði við Dimmuborgir er 30 mín. ganga, að hluta til innan Dimmuborga.

Dimmuborgir

Um borgirnar hafa verið merktar nokkrar gönguleiðir með mismunandi litum og má fá nánari upplýsingar um þær í upplýsingamiðstöðinni. "Litli hringur" liggur næst bílastæðinu og tekur 10-15 mín. að ganga hann. "Stóri hringur" nær lengra inn á svæðið og tekur gangan um hálftíma. "Kirkju-hringur" er um klukkustundarganga. Allar eru leiðirnar greiðfærar. Varast ber að fara út af stígum þar sem vandratað getur verið.

Víti; ½ klst.

Stutt hringleið liggur umhverfis sprengigíginn Víti að hverasvæði austan gígsins. Leiðin er greiðfær.

Leirhnjúkur; 1-1½ klst.

Frá bílastæðinu nálægt Leirhnjúki liggur greiðfær stígur að hnjúknum. Leiðin liggur síðan um hverasvæði, inn í gíga frá Kröflueldum og upp á háhnjúkinn. Þaðan er farið suður fyrir hjúkinn og komið aftur inn á leiðina að bílastæðinu. Á þessari leið má fá góða mynd af umbrotum Kröfluelda.

Reykjahlíð - Hlíðarfjall - Leirhnjúkur; 3-4 klst.

Gangan hefst við upplýsingamiðstöð ferðamála í Reykjahlíð, gengið er upp með Eldánni að Hlíðarfjalli sem er líparítfjall og eitt af sérkennilegustu fjöllum í umhverfi Mývatns. Auðgengt er á það (771 m.y.s.) og útsýni þaðan mikið. Síðan er gengið í átt að Leirhnjúki og komið inn á hringleiðina um Leirhnjúk að sunnanverðu.

Dalfjallsleið; 2-3 klst.

Frá veginum í Námaskarði er merkt leið norður á Leirhnjúk. Hún liggur eftir Dalfjalli endilöngu með miklu útsýni til allra átta. Gengið er yfir hraun frá Mývatnseldum og síðan upp með mikilli misgengissprungu að bílastæðinu við Leirhnjúk. Eldstöðvar og misgengi á Dalfjalli gefa innsýn í landgliðnunina.

Námafjall;1 klst.

Frá Hverarönd er stutt en allbrött slóð á Námafjall sem er í 485 m hæð yfir sjó. Hægt er að ganga eftir brún fjallsins að Námaskarði en þar liggur slóðin niður að þjóðveginum og aftur inn á hverasvæðið.

Kálfastrandarland; 1 klst.

Leiðin hefst skammt innan við hliðið á heimreiðinni að Kálfaströnd, liggur út í Klasa, andspænis Höfða, og síðan til baka að veginum eftir vegslóða. Á leiðinni má sjá sérkennilegar hraunmyndanir og einna fegurst og fjölbreytilegast landslag á bökkum Mývatns.

Skútustaðagígar; 1 klst.

Leiðin liggur umhverfis Stakhólstjörn á Skútustöðum. Einnig er styttri hringleið inn á svæðið vestanvert og tekur hálftíma að ganga hana. Gangan er auðveld og í námunda við fjölbreytt fuglalíf.

Vindbelgjarfjall; 1 klst.

Fyllsta ástæða er til að mæla með göngu á Vindbelgjarfjall. Gangan hefst við bæinn Vagnbrekku. Eftir stuttan aðdraganda hefst brattgangan en fjallið er eins og önnur skyld, harla bratt efst og laust í sér en gróið neðan til. Hvergi er þó neitt klifur og leiðin fær fyrir alla. Þegar upp er komið geta göngumenn þaulskoðað Mývatn og hinar mörgu eyjar og gervigíga.