Herðubreið (1683 m) er af mörgum talin eitt fegursta fjall landsins og gengur gjarnan gengur undir nafninu drottning íslenskra fjalla. Herðubreið er kennslubókardæmi um móbergsstapa og rís 1100 m yfir hraunbreiðuna í kring, snarbrött og kringd hamrabelti hið efra. Fyrst var gengið á Herðubreið með vissu árið 1908 en fram að því hafði hún verið talin ógeng. Fjallið er erfitt uppgöngu en útsýni þaðan er óviðjafnanlegt.

Við rætur Herðubreiðar eru Herðubreiðarlindir, gróðurvin við rönd Ódáðahrauns en þar koma margar lindir fram undan hraunröndinni og sameinast, víða með fossbunum. Gróður í Herðubreiðarlindum er bæði mikill og fagur en mest ber á ætihvönn, gulvíði, grávíði og grasvíði en litskrúðugust er eyrarrós. Fundist hafa 72 tegundir háplantna á svæðinu. Herðubreiðarlindir eru af mörgum taldar einn fegursti bletturinn á öræfum landsins, einkum þó vegna útsýnis og andstæðna náttúrunnar. Herðubreið og nágrenni hennar var friðlýst árið 1974.